Миний бодлоор CSGO шигшээ баг бүрдүүлэхэд Эркаст-ыг тойруулаад баг босгох Dota 2 шигшээ баг бүрдүүлэхэд Хастла-г тойруулаад баг босгосон нь илүү амжилтанд хүрэх магадлал өндөр л гэж боддогын...
Gunnerz wrote:монголз тараад аль хэдийн 4-5 жил болж байна хөгшөөн
Newmeta Esports-оос ийм пост оруулсан байна лээ.
- | +
- Шигшээ баг ба клубын системийн ялгаа
Саяхан IESF World Championship DOTA2-ийн зүүн азийн сонгон шалгаруулалт явагдаж Монгол улс аваргаар тодров. Гэхдээ тоглолтоос илүүтэйгээр Монгол улсын шигшээ багийн бүрэлдэхүүн шүүмжлэл дагуулж хэдэн өдрийн турш Монголын испортынхны гол сэдэв болов. Гол буруутнаар Монголын Электрон Спортын Холбоо болж таарч сонгон шалгаруулалт хийгээгүй, дур мэдэн бүрэлдэхүүн сонгосон зэргээр буруутгагдаж нилээд цаашлаад үндэслэлгүй мэдээллүүдээр булуулаад дуусав. Уг маргааны талаар ямартай ч бид хараад суулгүй аль нэг талыг өмөөрөх гэсэнгүй, зөвхөн бодит дундын талаас ул суурьтай дүгнэлтүүд хийхийг хүслээ.
Мэргэжлийн спортын аливаа уралдаан хоёр системээр явагддаг. Нэг нь клубын систем буюу аль нэг улсын далбаан дор бус үүсгэн байгуулагчтай аливаа клубын нэрийн дор тоглож өөр хоорондоо өрсөлдөх. Үүнд NBA, NFL тэргүүтэй америкийн лигүүд, Premier league, La liga, Serie A зэрэг лигийн тэмцээнүүд, Champions league, Europa league гэх мэтээр жагсах бидний хамгийн үзэх дуртай тэмцээнүүдийг харж болно. Уг тэмцээнүүд гол зарчим нь улс үндэстэнээр өрсөлдөх нь чухал биш бөгөөд зөвхөн клубын нэрийн дор өөр хоорондоо өрсөлдөнө. Lakers, Barcelona, Red Bull Sallzburg гээд зөвхөн клубын нэрийг багаар төлөөлөх болохоос клубын дотор Словен тамирчин байхуу, Испани байх уу, Америк байх уу гэдэг чухал биш. Мэдээж аль хотын баг гэдгээсээ хамаараад хотын нэрээ авч явж хотын бэлгэ тэмдэг болж, хотын иргэд нь дэмжигчдийн дийлэнхийг эзэлдэг ч тэдний хувьд тамирчны гарал, туг гэхээсээ илүү клубын легаси, түүх, бэлэг тэмдэг Barcelona, Real Madrid гэдэг нэр л чухал. Тиймээс Африкаас ч бай, Монголоос ч бай хэн ч байсан тэдний логон дор тоглож буй бол тэдний хувьд хайртай тоглогч.
Харин мэргэжлийн спортын нөгөө өрсөлдөөн тэмцээн бол шигшээ багийн өрсөлдөөн. Энд ямар нэгэн клуб, нэгдэл тэр байтугай хот хоорондын өрсөлдөөн ч ямар ч хамаагүй. Та ямар ч клубт харъяалагддаг байсан энэ системд та өөрийн иргэншил бүхий улсаа төлөөлөн өрсөлдөнө. NBA-д олон багт өөр хоорондоо өрсөлдөж байсан тамирчид АНУ болж бусад улсуудтай өрсөлдөнө. Барселона, Реал Мадрид гэсэн Испанийн төдийгүй дэлхийн хүчтэй ривалууд энэ л мөчид Испани гэсэн далбаан дор найзууд болж улсынхаа далбаан дор тоглодог. Тэнд чи Барселона гээд Реалын хүнтэй хамтрагч болохгүй гэсэн юм байхгүй бөгөөд 7 хоногийн өмнө бие биентэйгээ зодолдох шахам байсан клубын өрсөлдөгчид хамгийн сайн найзууд болж бие биенээ ойлгох шаардлага үүсдэг. Гол шаардлага бол мэдээж тухайн улсынхаа нэр хүндийг олон улсад өргөж, олон нийтэд таниулж, цаашлаад нийгэм эдийн засгийн утгаар маш олон давуу талыг авчирах. Мэдээж гол утгаараа спортын багийн өрсөлдөөн үүсч буй гэдэг утгаараа улсынхаа далбаан дор өрсөлдөнө гэдэг үнэхээр том бахархууштай зүйл. Одоогоор дэлхийн бүхий л мэргэжлийн спортууд дээрх хоёр системийн дагуу өрсөлдөж, энэхүү системд захирагдан карьераа үргэлжлүүлж байна.
Харин esport-ын тухайд шигшээ багийн систем гэдэг тийм суурьшмал зүйл биш. Gaming-ээс спорт гэдэг шилжилтээ бүрэн хийж дуусаагүй байгаа спортын хувьд анх гарч ирсэн нэгдэл, баг, клубын өрсөлдөөн одоог хүртэл үргэлжилсээр буй. Түүнийгээ дагаад тэмцээн зохион байгуулагч байгууллага, хувь чиглэлийн бизнесүүд олон улсын холбоодуудаасаа эрт хүчирхэг байдлыг гартаа авч өрсөлдөөн талаасаа тэднээс хэдэн арван жилээр түрүүлээд буй. Үүний жишээ нь ESL, Flashpoint, PGL, Perfet World, Starladder гэх мэт хувь байгууллагуудын тэмцээн дэлхийн аваргын хэмжээнд үнэлэгдэж тамирчдын гол мөрөөдөл болсоор ирсэний баталгаа юм. Тэдний хувьд дээр дурдсан мэргэжлийн спортуудын клубын системийн өрсөлдөөний зарчмаар тэмцээнээ зохион байгуулдаг. Тиймээс чиний аль улс, хаана төрсөн чинь гэхээ илүү аль клубын багийн дор тоглож буй чинь л чухал. Бид одоогоор Na’Vi-ийн s1mple, Cloud9-д байсан Liquid-д одоо байгаа stew гэдгээр нь төлөөлүүлдэг болохоос s1mple-ийг Украйн хүн, stew-ийг Америкийн төлөө тоглодог гэдэг утгаар нь төдийлөн хардаггүй. Stewie2k клубын системтэй спортын тамирчин учраас түүнд Бразилын MIBR-д тоглох, Liquid-д тоглох нь цэвэр амжилтаас хамаарсан шийдвэрийн асуудал болохоос ямар нэгэн улс үндэстний өрсөлдөөнтэй холбогддоггүй. Энэ зэргийг харвал испортод одоогоор шигшээ багийн өрсөлдөөн гэдэг тун муу хөгжилтэй байгаа. Тиймээс IESF зэрэг нэг баг нэг улсын далбааг төлөөлж зөвхөн тухайн улсад иргэншилтэй хүмүүс өрсөлдөх шигшээ багийн системтэй тэмцээнийг хэн ч сонирхохгүй байгаа нь үнэн. Үүнд Дани улс оролцлоо ч хэзээ ч Astralis-ын тамирчид оролцохгүй, Хятадын дотачид хамгийн хүчтэй бүрэлдэхүүнээ илгээхгүй нь тодорхой.
Дахин шигшээ багийн системийн тэмцээнүүдийг тайлбарлахад үүнд клубын систем, клубын зохион байгуулалт, ойлголцол зэрэг ямар ч хамаагүй. Тэр утгаараа шигшээ багуудын тэмцээнийн урьдчилсан шатууд шигшээ багуудын хооронд л явагдана уу гэхээс хэзээ ч нэг үндэстнээс бүрдсэн клубуудын хооронд явагдаж аварга нь улсаа төлөөлнө гэсэн зарчим байдаггүй. Хэрвээ тийм зарчмаар явна гэвэл сагсаар жишээ авахад Испанийн шигшээ баг бүрэлдэхүүн дотооддоо сонгон шалгаруулалт явуулж аваргын төлөө Барселона Реал Мадрид нар өрсөлдөж ялагч нь явах шаардлагатай болно. Үүний үрээр Испаничууд олон улсад өрсөлдөхдөө Реалын тамирчидгүйгээр, NBA-д тоглодог Испани тамирчидгүйгээр өрсөлдөх шаардлагатай болно. Тийм ч учраас ямар ч бүдүүлэг улс шигшээ багуудын тэмцээнд дотоод клүбүүдээ хооронд нь өрсөлдүүлгүй учиртай. Зөвхөн хамгийн амжилттай байж болох тамирчдаа бүрдүүлж улсынхаа далбаан дор өрсөлдөхөөр илгээдэг. Үүнд гадаадад легионероор тоглодог тамирчин, дотоодын лигийн MVP, шилдэг найруулаг тоглогч гээд хамгийн хүчтэй л тамирчид багтахаас нэг клубыг дангаар нь пик хийгдэг тохиолдол байхгүй. Дээр үед мэргэжлийн спорт болхи байхад ойлголцлын асуудал үүснэ, нэгэнт нэг баг болчихсон гэдэг шалтгаануудаар буурай улсууд нэг сайн гэсэн багаа шалгаруулаад явуулдаг байсан ч энэ нь цаашдаа урт настай байсангүй. Испорт дээр олон талаас тамирчид ирж богино хугацаанд нэг баг болох нь ойлголцлын асуудалтай гэж байгаа ч бусад спортын тамирчид ч энэ замыг туулдаг. Хөлбөмбөг, сагс гэх мэт мэргэжлийн спортууд хэдэн зуун дамжсан испортоос хэд дахин нарийн төвөгтэй хөгжсөн спортууд. Эдгээр спортын тамирчид хүртэл жилийн бараг 90%-д нь клубын тамирчидтайгаа нэг баг болж ойлголцож хэв маягаа түүнд тааруулж тодорхой уур амьсгалд хамт олонд дасчихаад шигшээ багийн тэмцээнүүдэд өөр өөр клуб тоглодог тамирчидтай богино хугацаанд нэг болох шаардлага үүсдэг. Энэ өөрөө нэг талаас мэргэжлийн спортын шалгуур, шаардлага, тамирчны болон дасгалжуулагч арын албаны том даалгавар болдог. Испорт ч цаашдаа энэ замыг туулах л болно. Хэзээ мөдгүй шигшээ багийн өрсөлдөөнтэй тэмцээнүүд бий болж coldzera Faze-ийн андуудтайгаа клубын тоглолтоо хийгээд хэсэг хугацааны дараа Бразилын далбаан дор kng, art, kscerato нартай нэгдэж шигшээ багийн тоглолтоо хийхээс өөр аргагүй болдог болно. Украины шигшээг Na’Vi-ийн үндсэн бүрэлдэхүүн төлөөлж Украин нэрийн дор бусад улсуудтай өрсөлдөх боловч boombl4 ОХУ нэрийн дор тоглож Украинчууд boombl4-ийг шигшээн өрсөлдөөнд хэнээр орлуулахаа бодож толгойгоо гашилгадаг цаг ирнэ. Тиймээс клубын систем ба шигшээ багийн системийг тусд нь ялгаж салгаж ойлгож сурах нь бидэнд маш их хэрэг болох юм.
Шигшээ багийг хэрхэн сонгодог вэ?
Шигшээ багийг дээр дурдсанчлан хэзээ ч сонгон шалгаруулалт явуулж ялсан клубыг шигшээ багаар сонгодог туршлага дэлхийн спортод байдаггүй. Олон жилийн өмнө ийм туршилтууд байсан ч урт настай байсангүй, хамгийн буурай орнуудын л сонголт болж үлдсэн. Шигшээ багийн тэмцээнүүд олон улсын холбоодуудаас зохион байгуулагддаг тул харилцаа шууд дотоодын бүртгэлтэй олон улсын холбооны даалгавар болж үлдэнэ. Холбоо хэнийг илгээхээ шийднэ гэсэн үг. Үүний шаардлагаар улс болгонд үндэсний шигшээ баг гэж үүсдэг. Үүнд зөвхөн тамирчид багтах бус дасгалжуулагч, туслах дасгалжуулагч, арын алба гээд бүтэн баг бүрэлдэхүүнийг оноож ярина. Тиймээс олон улсын тэмцэний удирдаж ирэх үед холбооны спорт хариуцсан комисс болон шигшээ багийн алба бүрэн хариуцаж тэмцээнд оролцох тамирчдыг шигшээд дуудна. Шигшээ багийн дасгалжуулагч, менежер ямар арга барилтай хүн, ямар бодлогыг барьж байгаа зэргээс хамаараад шигшээн бүрэлдэхүүнийг хэрхэн бүрэлдүүлэх эрхийг эзэмшдэг бөгөөд хэнийг үлдээсэн, хэнийг багтаасан талаар холбооны удирдлага болон хөгжөөн дэмжигчид мянга орилоод нэмэр байдаггүй. Эцэстээ тухайн дуудагдсан тамирчид хэрхэн амжилт үзүүлэхээс хамаарч дагсалжуулагч болон шигшээ багийн албаны бүрэлдэхүүн солигдох эсэх нь шийдэгдэнэ. Германы хөлбөмбөгийн шигшээ 2018 оны дэлхийн аваргаар клубтээ тасархай амжилттай байсан Лерои Санэг дасгалжуулагч Иохим Лөв үлдээж байлаа. Хөгжөөн дэмжигчид үүнд сэтгэл дундуур байсан ч Иохи Лөвийг халалгүй үлдээж байв. Энэ мэтчлэн шигшээ багт сүпэр тамирчдыг ч багтаадаггүй, заавал нэг клубын олон тамирчдыг дууддаг гэсэн хэвшмэл ойлголтууд ч эвдэгдэх болсон. Шигшээ баг гэдэг өөрөө бас нэгэн өрсөлдөөний систем учраас үүнд өөр зарчим, шалгаруулалт, өөр үзэл бодол, өөр стандарт үйлчилнэ. Тэр ч утгаааа манайх ч үүнд бэлдэж шигшээ багийн тамирчдын pool үүсгэх, тэндээсээ тамирчдаа бүрдүүлэх, дасгалжуулагчтай болох, болвол арын албыг эртнээс тооцоолж эхлэх зэрэг арга замуудыг авч эхлэх нь зүйтэй.
Яг үнэнийг хэлэхэд MESA-ийн сонгон шалгаруулалт хийлгүй холбооны спорт хариуцсан хүмүүс шигшээ багийн тамирчдыг сонгосон нь зөв шийдвэр байв. Гэвч албан ёсны тайлбар дээрээ сонгон шалгаруулалт хийгээгүй нь цаг хугацааны шахуу байдал, цаанаас ирсэн шахуу удирдаж зэрэгтэй холбоотой гэсэн тайлбар нь таалагдсангүй. Холбоо өөрийн гэсэн арга барил, үзэл бодол, байр суурьтай байж түүнийгээ хамгаалж, фэйбүүкээр ирж буй сошиал дайралтанд тэсч үлддэг байх ёстой. Энэ мэтчлэн утгагүй сонгон шалгаруулалт хийх ёстой гэсэн дайралтанд тэсч үлдэхгүй бол холбоо өөрөө мэргэжлийн ажиллаж хэзээ ч чадахгүй болов уу. Хэрвээ үнэхээр зохион байгуулагчийн удирдамж, гишүүнчлэлийн статусын шинэчлэл, цаг хугацаанаас болж сонгон шалгаруулалт хийх гэж байгаад хийж чадаагүй бол буруу. IESF-ийн тэмцээн бол клуб сонгон шалгаруулалтаас ялаад улсыг төлөөлдөг тэмцээн биш шигшээ багуудын өрсөлдөөн юм. Extremesland, ASUS Rog, WESG /улсыг клуб шууд төлөөлөх боломжтой заавал дотоодын сонгон шалгаруулалт хийдэг тэмцээн/, ESL, IEM зэрэг тэмцээнд бол клуб өөрсдийгөө төлөөлөөд сонгон шалгаруулалтаас ялж гарч ирдэг тэмцээн. Шигшээ багийн тэмцээн бол баг шигшэх биш тамирчин шигшэх ёстой тэмцээн юм.
Энэхүү бичвэрийг ямар нэг байдлаар аль нэг талыг хамгаалах гэж бичсэнгүй. Арай ул суурьтайгаар гуравдагч талын өнцгөөс, Newmeta-ийн нэгэн гишүүний хувиар бусад спортын жишгүүдтэй, ирээдүйн боломжуудтай харьцуулан буулгалаа. Та бүхэн уншаад эрүүл маргалдаан үүсгэнэ биз ээ. Уг маргаанууд бидний хувьд ярих ёстой маш том сэдвийг хөндсөн хэрэгтэй маргаан болж гэж харж байна. Үүнээс шалтгаалаад холбоо маань олон улсын шигшээ багийн тэмцээнүүдэд бүрэлдэхүүнээ хэрхэн сонгодог болох зарчмыг суулгах, бусад мэргэжлийн спортын стандартыг дагах, ирээдүйд бэлдэхэд суралцах зам дээр ирээд буйг сайтар ухамсарлах. Нөгөө талаас хатуухнаар хэлэхэд манай испорт дагагчид спортын талаар ч олон талын үзэл байх дээшлүүлэх шаардлагатай гэдгийг сануулсан үйл явдал болов. Мэргэжлийн спортод үзэл бодол, логик үйлчилдэггүй зөвхөн стандарт үйлчилдэг гэдгийг л аль аль тал нь ухамсарлах нь зүйтэй юм.