Ajax-ийн сүйрэл
Голландын хөлбөмбөгийн домогт баг "Аякс" энэ улирлын "Аваргуудын лиг"-ийн урьдчилсан шатанд ялагдаж бөөн дуулиан тарьсан билээ. Гэтэл энэхүү гутамшиг нь UEFA-гийн цомд үргэлжилж тус тэмцээнээс ч мөн хасагдав. Өмнөх түүхийг нь сөхвөөс Амстердам хотын клуб сүүлийн гурван жил дараалан дэлхийн хамгийн нэр хүндтэй тэмцээн болох Аваргуудын лигт оролцож чадаагүй байна. Гурван он дамнасан одгүйтлээ үгүй хийхийн тулд багийн эзэд дасгалжуулагчаа солих алхам хийсээр ирсэн ч тусыг эс олсоор. Гэтэл хэргийн гол учир нь дасгалжуулагчид бус, "Аякс"-ын удирдлагын олон арван жилийн турш мөрдөж ирсэн увайгүй бодлогод байгаа ажээ
.
Куманы хувьсгал
"Аякс" клуб Голландын аваргаар хамгийн сүүлд 2004 онд шалгарсан. 29 дэх түрүүгээ авсан тэр амжилтын эзэн нь Рональд Куман байлаа. Хиддинк, ван Гаалийн школоор хүмүүжсэн тэрбээр олсон туршлагаа "Витесс"-д туршиж үзсэн. Тэрбээр багаа муугүй жолоодсон тул "Аякс"-т очих урилгыг авчээ. Очсон даруйдаа тус клубийн уламжлалт тактик болох 4-3-3-ыг 4-4-2-оор сольж, зарим тохиолдолд 4-5-1 системээр тоглуулах болсон нь хөгжөөн дэмжигчдийн хүчтэй эсэргүүцэл хүлээв. Гэлээ ч Куман үзэл баримтлалаасаа буцаагүй бөгөөд түүнийгээ тууштай мөрдсөөр гурван жил "Эре дивизион"-ы аварга болоогүй "Аякс"-ыг 2004 онд түрүүлүүлж, улмаар Голландын цомын эзэн болгожээ. Дараа онд лигийн тэргүүн багийн байраараа хадгалах боломжтой байсан ч Хиддинк ба түүний "ПСВ Эйндховен"-ий аз ивээн ганцхан оноогоор тэргүүлсэн юм. Рональдын баг дотоодын тэмцээндээ ийнхүү одгүйтсэн ч гэлээ Европын индэрт шагшигдахаар амжилт үзүүлсэн билээ. Тэд Аваргуудын лигийн шөвгийн наймд шалгарч, тус тэмцээний ирээдүйн аварга "Милан"-д нэр төртэй хожигдсон.
Куманы өсөн дэвшилтийн нууц нь тактикийн өөрчлөлт байсан төдийгүй "Аякс"-ын академиас авьяастнуудыг төрүүлэн гаргасанд оршиж байв. Чухам түний үед "Де Тукомст" буюу "Ирээдүй" академийн ван дер Варт, ван дер Мейде, Хөйтинга, Пиенаар, Снайдер, Де Йонг, Де Мул, Де Риддер нарын авьяастнууд супер оддын зиндаанд хүрэх их аянаа эхэлсэн юм. Голланд дасгалжуулагч нутгийн дээрх залуусынхаа хүчийг Ибрагимович, Галашек, Грыгера, Пасанен, Максвелл, Трабелси нарын легионерүүдтэй уялдуулж чадсаны дүнд уруудаж явсан "Аякс"-ын үзүүлэлт өндийсөн нь гарцаагүй үнэн.
Куман тэдгээр их ирээдүй ханхлуулсан хөлбөмбөгчдийг удирдаж байхдаа "Одоо байгаа хэдийгээ үлдээж чадвал бид таван жилийн дараа Аваргуудын лигт түрүүлнэ" хэмээн мэдэгдэж байсан. Гэвч мөрөөдөлдөө хүрэх хувь түүнд байсангүй. Багийн удирдлага мөнгийг амжилтаас түрүүнд тавьдаг уршигт зандаа хөтлөгдөн Киву, Мидо, ван дер Мейдег худалдаж 36 сая еврогоор баяжив. Мөн удалгүй гол тоглогч Ибрагимовичийг "Ювентус"-д 16 саяар өгөн "Аякс"-ын ирээдүйг харанхуйлуулах их аянаа үргэлжлүүлсэн байдаг. Ингэснээр "Амстердам Арена" цэнгэлдэх дахин манангаар хучигдсан түүхтэй. Үүний баталгаа нь "Аякс" 2005 оны Голландын АШТ-ий гуравдугаар байрт шалгарч, UEFA-гийн цомын 1/16 шатнаас хасагдсан явдал юм. Энэ бүхний дараа Куман огцрох өргөдлөө өгөн одохдоо "Аль эрт яваагүйдээ харамсч байна. Жил бүрийн төгсгөлд дахин шинээр барьдаг байшинд амьдрах хэцүү юм" хэмээн халагласан удаатай.
Блинд 422 хоног шаналсан нь
"Де Тукомст" академийг тэргүүлж байсан Данни Блиндэд багаа даатгахдаа "Аякс"-ын удирдлага ихийг хүлээж байгаагүй биз ээ. Хүлээх ч үндэс байсангүй. Учир нь хамгийн сүүлчийн одод нь болох ван дер Варт, Де Йонг, Эскюде, Лобонт нар "Гамбург", "Севилья", "Фиорентина" руу явж байв. Хачирхалтай нь тэдгээр хөлбөмбөгчдийнхөө наймаанаас багийн эзэд дөнгөж 10 сая еврогийн ашиг олжээ. Нөхдөө уриалан дуудах чадалтай нэг ч тоглогч үлдээгүй тул "Аяксынхан" довтлогч Хунтелаарыг 9 сая еврогоор худалдаж авсан ч тусыг олсонгүй. Тэд "Эре дивизион"-ы дөнгөж дөрөвдүгээр байр эзлэхдээ аварга "Эйндховен"-оос даруй 24 оноогоор хоцорсон байна. Гутамшигт байдалд орсон Блинд огцрох хүсэлтээ гаргаж, аврагчийн албанд Хенк Тен Кате томилогдов. "Барса"-гийн дасгалжуулагч Франк Райкаардын тодорхойлсноор тэрбээр "тактикийн сод ухаантан" ажээ.
"Тактикийн сод ухаантан"
Гэвч энэхүү сод ухаантан байгаа нөхцөл байдлыг өөрчилж чадсангүй. "Аякс" Аваргуудын лигийн урьдчилсан шатны эхний тоглолтод Данийн "Копенгаген"-ыг талбай дээрээ 1:0-ээр хожсон авч хариу тоглолтод 1:2-ээр дийлдэн UEFA-гийн цом руу уруудсан. Тиймээс бүх хүчээ дотоодын тэмцээндээ төвлөрүүлж, аварга цолын төлөө "Эйндховен", "А3"-тай тулалдаж эхлэв. Эцсийн дүнд "Эйндховен", "Аякс"-ын оноо тэнцэхэд Роттердамын баг бөмбөгний харьцаагаар (50/49) тэргүүн байр эзэлжээ. Нэгэнт Аваргуудын лигийн урьдчилсан шатанд тоглох эрхтэй болсон тул "Аякс"-ын эзэд ээлжит "их цэвэрлэгээ"-гээ хийж эхлэв. Тэд Бабель, Снайдер, Де Мул, Пересийн наймааны дүнд 50 сая евротой болсон бөгөөд тэдгээр тоглогчдынхоо араас Хунтелаарыг үдэж мордуулахаар зэхсэн. Гэвч ямар ч азаар юм, тэрбээр багтаа нэг улирлыг үдэхээр болсон байна. Тен Кате хэдий "тактикийн сод ухаантан" ч "Аякс"-ыг аюулаас аварч чадсангүй. Түүний баг Аваргуудын лигийн урьдчилсан шатанд Чехийн "Славия"-д дийлдсэн даруйдаа UEFA-гийн цомын үндсэн тэмцээнд оролцох эрхгүй хоцорчээ. Учир нь тэд тус тэмцээний урьдчилсан тоглолтод Загребийн "Динамо"-д ялагдсан юм. Үүний дараагаар Кате үүрэгт ажлаа орхин "Челси"-гийн туслах дасгалжуулагч болохоор одож, түүний орыг залгах золиосны хүнээр Адри Костер томилогдсон. Тэрбээр Блиндийг үндсэн багийг удирдахаар явсан үед "Де Тукомст" академийг тэргүүлж байв. Костер залуучуудтай ажиллахыг илүүд үзэж буй тул одоохондоо үүрэг гүйцэтгэгч нэрээр "Аякс"-ыг дасгалжуулж буй. Багийн эзэд Марко ван Бастеныг урхидахыг оролдсон боловч Голландын хөлбөмбөгийн холбоо "100 сая евро амласан ч түүнийг өгөхгүй" гэдгээ мэдэгджээ. Тиймээс бодлогогүй эзэд Мартин Йолыг богтлох аянд мордож байгаа гэнэ.
Аяаксын сэдэв нээхээс зайлcxийгээд Аяаксыг дэмждэг фанууддаа зориулаад энд тавив.
Хэн нэгны блогоос............