Манай Бүлтүүшийн наймаа эцэслэн шийдэгдсэн тул, гүүнерүүд бидэндээ хандан ийнхүү захидал илгээжээ. Хобби учраас сийрүүлэхгүй байж чадсангүй. Бага зэргийн уянгын халил орсон байхыг бол үгүйсгэхгүй.
ХҮНДЭТ БУУЧИД АА,
Долоон жил хагас. Бараг гурван мянган өдөр. Лондонд өнгөрөөсөн энэ урт хугацааны дараа ийм захидал бичээд сууж байгаа минь сонин санагдаж байна. Анх ирсэн цагаас л шууд гэр шиг минь дотно санагдсансан. Арсеналын бүхий л ажилчид, багийн гишүүд, хамгийн чухал нь гайхамшигт хөгжөөн дэмжигчид намайг алга дэлгэн угтаж билээ. Тэртээ 2013 оны есдүгээр сард Арсэн Вэнгэрийн надад үзүүлсэн тэр их итгэлд үргэлж талархаж явах болно. Умард Лондонд би өсөж том болсон, өөрийн гэрээ хэмээн бодож явна. Хэзээ ч мартахгүй.
Арсеналд олон жил тоглосон болохоор өгсөж уруудах үе байсан нь үнэн. 250 тоглолт, 44 гоол, 71 дамжуулалтын дараа бидний зам ийнхүү салж байна. Хамтдаа бид клубын 9 жилийн цомын цангааг тайлж, хөгжөөн дэмжигчдийн хүртэх эрхтэй, удаан хүсэн хүлээсэн цомыг авч ирсэн.
Клуб болон хөгжөөн дэмжигчдийг ямар их хайрлаж явдгаа үгээр илэрхийлэхэд их хэцүү байна. Найман жилийн баяр талархал ганц захидалд яахин багтах билээ? Хэдий би клубын төлөө тоглохгүй боловч, тоглолт бүрийг нь алгасалгүй дэмжих болно. Насан туршдаа БУУЧИН байх минь маш тодорхой, эргэлзээ байхгүй. Яг одоо л бид баг бүрэлдэхүүний арыг дааж дэмжих хэрэгтэй. Ялангуяа энэ улирал Премьер лигийн бүх багуудын хувьд маш хэцүү улирал болж байгаа учраас одоогийн энэ бүрэлдэхүүн, дасгалжуулагчдыг ямар ч нөхцөлд дэмжих ёстой. Миний хувьд Хэйл Эндээс угшилтай залуу хөвгүүд үндсэн багт хүч түрэн орж ирж байгааг харах үнэхээр сайхан байна. Тэд бол манай ирээдүй юм гэдгийг бид бүгдээрээ сайн мэднэ. Тэдэнд амжилт бүхнийг ерөөе.
Миний нэрийг Эмирэйтс цэнгэлдэхээр дүүрэн уухайлан дуудаж байсныг санах бүрд хамаг бие минь чичрэн догдолж, энэхүү өмсгөлтэй тоглож байсан дурсамж бүр минь сэтгэлд минь үүрд мөнхрөх болно. Арсеналд өнгөрүүлсэн он жилүүдийн минь талаар зөндөө их бичсэн, ялангуяа сүүлийн хэдэн сард бүр их. Арсенал бол өндөр зиндааны, нэр хүндтэй клуб юм, түүнийг нь ч талбай дээр гарах бүрдээ би мэдэрдэг байсан. Тоглогчид, ажилчид, удирдлага ирдэг, бас явдаг, гэвч клубын үнэт зүйл болон хөгжөөн дэмжигчид хэзээд байсаар байх болно. Класс зиндаа, хүндлэл, ёс суртахууны зарчмууд хэзээ ч мартагдах ёсгүй. Эдгээр үнэт зүйлсийг чиг болгон ажиллах нь клубын бүх хүмүүсийн үүрэг хариуцлага юм.
Өмнө хэлсэнчлэн сүүлийн хэдэн сар амаргүй байлаа. Тоглогч нэг бүрийн адил би багийнхандаа тусалж, тоглолт бүр дээр гарч тоглохыг хүсдэг. Даанч амьдрал дандаа бидний хүссэн, төлөвлөсөн хэвээр явах биш дээ. Гэхдээ амьдралд учирсан тохиолын базаахгүй талыг биш харин өөдрөг гэгээтэйг нь харж амьдрах нь чухал учраас би харамсал тээхгүй явахыг хичээж, элдэв муу юм санахгүй ээ. Арсеналд байна гэдэг минь зөвхөн хөлбөмбөгөөр ч хязгаарлагддаггүй, бас нутаг олны нэг хэсэг байхыг хэлдэг. Талбай дээр бусдад туслахыг хүсдэг шигээ би Лондонгийнхны нэг хэсэг байхыг ч хичээсээр ирэв. Умард Лондон намайг өөрийн хүү хэмээн үзэж, би улирал бүрд өөр нэгэн төслөөр энэхүү гайхамшигт газрынханд аз жаргал бэлэглэхийг хичээдэг байлаа. Хэдий би Умард Лондонгоос явж байгаа боловч эхлүүлсэн ажил минь зогсолгүй үргэлжилсээр байх болно.
Нэгэн бүлэг ийнхүү төгсөж байгаа боловч энэхүү гайхамшигт клубтэй үүсгэсэн холбоо минь хэзээ ч бүдгэрэхгүй ээ. Одоохондоо баяртай гэж байгаа боловч үүрдийн хагацал биш юм шүү.
Хорвоогийн хамаг Гүүнерүүдэд: YaGunnersYa
Мэсүт.
***
Мэсүт Өзилийн захидлын эх:
https://www.facebook.com/mesutoezil/pos ... 6182926923Зургийн эх сурвалж:
https://indianexpress.com/article/sport ... l-6168543/***
Монголчлон буулгасан: Д.Цогчулуун
2021.01.25