by Цогоо » Tue Dec 24, 2019 8:55 am
ХЭН ЮУ ЯРИВ?
Микэл Артэта
Би энэ клубыг маш их хүндэтгэдэг. Энэ ажлыг хийхэд бэлэн биш гэж бодож байсан бол ингээд та бүхний өмнө сууж байхгүй байсан. Би энд ирж ажиллахыг үргэлж хүсдэг байсан. Эндээс явж байхдаа хүмүүст би гадагшаа гараад, суралцаад, өөрийгөө бэлдсэний дараа чадвал эргээд энд ирнэ ээ гэж хэлж байлаа. Яг ийм боломжийг хүлээж сүүлийн хэдэн жил бэлдсээр байсан. Арсеналын хэрийн клубын хувьд хүлээлт хэр өндөр байдгийг би мэднэ. Үүнийг хийхэд би бэлэн. Намайг ажиллуулахыг үнэхээр хүсэж байсан болохоор би энэ дуудлагыг хүлээж авахаар шийдсэн.
Хамгийн эхэнд өөрчлөх юм бол эрч хүч. Өнгөрсөн долоо хоногт би энд ирээд нэлээн гутарсан. Дасгалжуулагч нар, ер нь бүгдийнх нь ижил зорилготой болгох хэрэгтэй. Зөв соёлыг үрслүүлэх ёстой. Ингэж амьдрах ёстой гэдгийг бүгдэд итгүүлэх нь миний гол ажил байх болно. Яг одоогийн байдлаар бид тоглолтод хожих хэрэгтэй, итгэлийг улам нэмэгдүүлж, хөгжөөн дэмжигчдийг өөрсдийн талдаа эргүүлэн авчрах хэрэгтэй байна. Тэдэнтэй улам дотно холбогдож, клубын төлөө юу хийж чадах вэ гэдгээ тэдэн мэдрүүлэх хэрэгтэй байна. Энэ хоёр маш чухал зүйлийг нэгтгэх хэрэгтэй.
Хөндлөнгөөс харахад клуб сапирч байгаа юм шиг харагдсан. Яагаад ингээд байгааг нь ойлгомоор байна. Учрыг нь хурдан олбол шаардлагатай зүйлсийг яаралтай хийж хожлын замд түргэн орох хэрэгтэй. Зөв амьсгал бүрдүүлэх хэрэгтэй байна л даа. Клубын амбиц бол тодорхой. Европт тоглож, том цомуудын төлөө үзэлцэх. Энэнээс доошоо бол хангалтгүй. Энэ клубт эрч хүч, хүсэл тачаал авчрах хүмүүс л хэрэгтэй. Энэ зорилгыг дэмжихгүй, сөрөг нөлөөтэй хэн ч байсан энэ соёл, орчинд тохирох хүн биш гэж үзнэ.
Мартин Кеовн
Хэлэхэд эрт байна л даа. Өмнө нь клуб удирдаж үзээгүй хүнд ийм нүсэр ажлыг даатгаж байгаа нь Арсеналын удирдлага түүнийг хэр их үнэлж байгааг харуулж байна. Нөхөр бол анхнаасаа л менежер болох зорилготой байсан хүн, сүүлийн гурван жил профессортой хамт ажилласан. Пэп Гуардиола бол маш онцгой менежер, миний бодлоор бол хөлбөмбөгт байгаа хамгийн шилдэг нь байх, гэхдээ ингээд яг өөрийн толгойг дааж ажиллах гэдэг бас нэг өөр хэрэг. Арсеналд учрыг нь олж шийдэх ёстой маш олон асуудал байна. Гранит Жака ахлагчийн суудлаа алдсан байна, Мэсүт Өзилийн асуудал байна, бас дээр нь талбай дээрх унжгар тоглолтууд байна. Өнгөрсөн долоо хоногт Сити Арсеналыг яаж дарласныг харсан шүү дээ.
Удирдлага бол түүнийг авчиръя гэж дээрээс бодож байсан бололтой, гэхдээ түүний хувьд бол энэ клубыг мөрөндөө тээгээд явах нь маш том хариуцлага болно, тэрийг ч эхний хэдэн тоглолтоор өөрөө ойлгох биз. Ямартаа ч хялбархан шийдэх юм биш. Багийнхны итгэл гэж байхгүй, форм гэж юм байхгүй, доод лиг рүү унах хэмжээний тоглолт үзүүлж байгаа. Нээрээ шүү, байдал тэгтлээ дордсон байна. Хийх ажил маш их байна. Бүтэлгүйтлээ гэхэд ингэх нь тодорхой байсан гэж бид ярьцгаана. Харин амжилттай эргүүлчихвэл шилдэг менежерүүдийн эгнээнд зүй ёсоор ороод явчихна.
Дэвид Сийман
Будаг нь ханхалсан шинэхэн менежер шүү дээ, Арсенал бол маш том эрсдэл үүрсэн. Гэхдээ надад хэвлэлийн хурлаар ярьсан нь ёстой таалагдсан, өөртөө маш итгэлтэй, эерэг хандлага. Энэ бол цоо шинэ эхлэл, энэ эхлэлийг тоглогч нар ч бас хамт хийх хэрэгтэй, яагаад гэвэл тэд ч бас өөрсдийгөө өөрчлөх ёстой. Энэ сүүлийн жил гаран хугацаанд тэд өөдтэй байгаагүй, лигийн хүснэгтийн байрлал бол тоглогчдоос хамаарч байгаа шүү дээ.
Миний бодлоор тоглогч нарт заавар, зөвлөгөө хэрэгтэй, бас нэлээн зандарсан ч яах вэ. Ойрд арай л назгайраад байгаа харагдсан. Хамгаалалтыг бол нэлээн сайн анхаарах хэрэгтэй, яагаад гэвэл энэ янзаараа бараг хоёр гурван жил явчихсан. Манайд бас чанга, нэлээн хүчтэй хамгаалах чиглэлийн хагас хамгаалагч дутагдаад л байгаа. Тэгэхээр удирдлагын зүгээс энэ чиглэлээр анхаарна гэсэн амлалт өгсөн бол ойрын хэдэн цонхоор цэгцлээсэй гэж л найдаж байна даа.