by Captain » Sun Apr 19, 2009 7:12 pm
MBM Хасын хүлгүүд аваргын төлөө
МСБХолбоо Эм Си ЭС Груптэй хамтран зохион байгуулж буй сагсанбөмбөгийн 14 дэх удаагийн лигийн аварга шалгаруулах тэмцээний Play off-н тоглолтууд өндөрлөлөө. Тойргийн тоглолтод оноогоороо тэргүүлсэн шилдэг 4 баг болох Ёлууд, Баянзүрх Бүллс, МВМ, Хасын хүлэг багууд аваргын төлөө тоглох эрхийг олж авахын тулд тус бүр 4 тоглолт хийснээс Хасын Хүлэг Ёлуудын хожлын харьцаа 3:1, МВМ болон Баянзүрх Бүллсийнх мөн 3:1 болж аваргын төлөө тоглох эрхийг Хасын Хүлэг, МВМ багууд авч чадлаа.
Өчигдөр өндөрлөсөн Play off-н тоглолтын 7 дахь тоглолт МУИС-ийн МВМ, Бридж Констракшины Баянзүрх Бүллс багуудын тоглолт байлаа. МВМ-чүүдэд 2 хожигдож 1 хожоод байсан Бүллсчүүдийн хувьд энэ өдрийн тоглолт маш хариуцлагатай шийдвэрлэх тоглолт байлаа. Тийм ч учраас Бүллсчүүд тоглолтын эхнээс л нямбай тоглож 1-р үеийг 23:15-р, 2-р үеийг 41:34-р хошуучилж байсан. Харин тоглолтын 3-р үед МВМ-чүүд ширүүсч эхний 3 минутад оноогоо нөхөж 45:45-н харьцаагаар тэнцэж эхэлсэн. Энэ үеэс эхлэн 2 багийн довтолгоонууд ар араасаа амжилттай болсоор 3-р үе 61:61-н тэнцээгээр өндөрлөсөн юм. Ингэж онооны харьцаа тэнцүүхэн явсан хөлс урсгасан тулааны шийдвэрлэх 4-р үеийн 6 минутад МВМ-н Ууганбаяр, Батжавхлан нар алсын зайн шидэлтийг амжилттай гүйцэтгэж онооны давуутай болсноор багийнхныхаа тоглолтыг сэргээж, тэд санаачлагыг гартаа авч эхэлсэн бөгөөд тоглолтын цаг дуусахад 86:73-н харьцаагаар МВМ-чүүд ялалт байгуулж 3 дахь хожлоо авснаар аваргын төлөө тоглох эрхийг авлаа. Тус тоглолтод МВМ-ийн Ихбаяр, Азбаяр, Батжавхлан, Золжаргал нарамжилттай тоглож тус тус 17 оноогоор багийнхаа ялалтад хувь нэмэр оруулсан бол Бүллсчүүдээс Шаравжамц 20 оноо, Цогтбаатар, Бат-Орших нар 16 оноог авчээ.
Энэ өдрийн сүүлийн тоглолт буюу Play off-н 8 дахь тоглолт Хас Банкны Хасын Хүлэг, Таван Толгой Трансын Ёлууд багуудын учраа байлаа. Хасын Хүлэгүүдэд 2 хожигдоод байсан Ёлууд энэ өдөр хожигдвол аваргын төлөө тоглох эрхийг алдах байсан учраас тоглолтын эхний үеэс л хариуцлагатай, хамгаалалт сайтай, довтолгоон бүр дээрээ анхааран тоглож байсан ч тоглолтын төгсгөл рүү сэлгээний тоглогчгүй тэд ядарч тоглолт нь унаж эхэлснээр хашир Хүлэгүүдэд 78:68-р хожигдож аваргын төлөө тоглох эрхээ алдлаа. Тоглолтын 1-р үеийг Ёлууд 21:15-р, 2-р үеийг 42:30-р тус тус хошуучилсан бол 3-р үеийн цаг дуусахад 2 багийн онооны харьцаа 55:55 болон тэнцсэн. Шийдвэрлэх үеийн эхний 4 минутад онооны харьцаа тэнцүү хэвээр байсан ч 6 минут 50 секундэд 59:57-р Хүлэгүүд хошуучлан, энэ үеэс санаачлагыг атган амжилттай довтолгоонуудаар өөрсдийн хожлын оноог авч чадсан юм. Энэ тоглолтод Хүлэгүүдээс Мэргэн 28 оноо, Отгонмөнх 21 оноо авсан үзүүлэлттэйгээр тоглосон бол Ёлуудаас Мөнхтүвшин 18 оноо, Мөнхболд 17 оноог багтаа авчиржээ.