2000 ОНЫ ФИНАЛЫН 4 ДЭХ ТОГЛОЛТ: ШАГАЙНЫ ГЭМТЭЛТЭЙ КОБИ
Коби карьерийнхаа турш том жижиг олон л гэмтэл авч байсан. 1999-2000 оны улирлын өмнөх тоглолтод Вашингтоны эсрэг тоглож байхдаа гараа гэмтээсэн, тэр жилийнхээ финалд шагайгаа булгалсан ч тоглосоор бөгж зүүсэн. 2007 оны 12 сард Никсийн талбайд тоглож байхдаа хамгийн залуу 20 мянгатан болох үедээ шиддэг гарынхаа чигчий хурууг гэмтээсэн байсан ч мэс засалд орохоос татгалзаж, улирлын бүх 82 тоглолтонд оролцон анх удаагаа улирлын үнэ цэнэтэй тоглогч болсон. Улирал дуусахад ч олимпод орох байсан учраас мөн л мэс засал хийлгэлгүй тухайн жилээ олимпийн аварга болсон. 2009 онд Миннесотагийн эсрэг тоглож байхдаа баруун гарынхаа долоовор хурууныхаа ясыг цуулсан. Гэсэн ч тоглолтыг өнжөөгүй үргэлжлүүлсэн. 5 хоногийн дараа Баксийн эсрэг, тэгээд Сакраменто, Мемфис, Бостон, Торонтогийн эсрэг хожлын шидэлт хийж, энэ үзүүлэлтээрээ тухайн улиралд бүх тоглогчдыг тэргүүлсэн бөгөөд улмаар хамгийн залуу 25 мянгатан болсон. 2010 оны финалд хуруу болон өвдөгний гэмтэлтэй тоглосоор финалд Бостоныг хожиж түрүүлсэн. 2011 оны зун Герман явж өвдөг болон шагайгаа эмчлүүлсэн ч улирлыг бугуйны гэмтэлтэй эхлүүлсэн. 2013 онд сүүлийн 6 жилийн хамгийн их 38,6 минут дунджилсан бөгөөд лигт түүнээс олон минут тоглож байсан ганц тоглогч нь Портлэндийн рүүкий Лиллиард байсан. Ахмад тоглогчийн хувьд хэт ачаалалтай тоглосоор 4 сард Голден Стэйтийн эсрэг плэйоффийн эрх авахын төлөөх чухал тоглолтод 2 ч жижиг гэмтэл авсны дараа ахиллисийн шөрмөсөө тасалсан. Гэсэн ч 2 чөлөөт шидэлтээ гүйцэтгээд, үзэгчидээ хүндэлнэ хэмээн бусдын туслалцаагүйгээр өөрөө алхсаар талбайг орхисон. Түүнээс өмнөх 7 үед багадаа 40 минут тоглоод байсан юм.
Товчхондоо Коби карьерийнхаа турш хэр баргийн гэмтлийг тоолгүй, шүд зуун тоглосоор ирсэн. Хүн бүр 1997 оны Чикаго Буллз, Юта Жаззын финалын 5 дахь тоглолтод Майкл Жордан ханиадны улмаас өндөр халуурч байсан ч өөрийг нь тоглуулахгүй гэсэн Фил Жэксонд "Би чадна" гэсээр тоглож, 38 оноо түүн гайхамшгийг бүтээснийг дурсан ярьдаг. Би энд харьцуулалт хийж, эцэс төгсгөлгүй мөнхийн маргааныг үргэлжлүүлэх гэсэнгүй. Зүгээр л Коби ч мөн адил финалын тоглолтод шагайны гэмтэлтэй байхдаа өөрийг нь тоглуулахгүй гэсэн дасгалжуулагчдаа "Би чадна" гэсээр тоглон, гайхамшгийг бүтээж байсан бөгөөд Фил Жэксон "Тэр надад Майклийг санагдуулсан. Түүнийг юу ч зогсоож чадахгүй" гэж хэлж байсан бяцхан түүхийг л сонирхуулж байна.
/"Коби гэмтэлтэй мөртлөө л би тоглож байгаа шүү гэдгээ харуулж нэр хүнд олж авахын тулд гэмтээгүй мөртлөө худлаа баашилдаг, тэгэхэд Жордан үнэхээр халуунтай байхдаа ч тоглож байсан" гэсэн увайгүй зүйл ярьдаг зарим нөхдөд ч зориулав/
Фил Жэксон:
Финалын тоглолтод бид Индиана Пэйсерстэй тоглосон. Эхний тоглолтонд Шак 43 оноон дээр нэмээд 19 удаа самбараас бөмбөг авч Пэйсерсийг живүүлсэн бол Миллер 16 шидэж ердөө ганцыг нь оруулснаар тоглолт эрт шийдэгдсэн. Хоёр хоногийн дараа болсон тоглолтонд Шак өөр нэг гайхалтай гүйцэтгэлээ толилуулж, Райс, Харпер нар тус бүр 21 оноо авснаар Пэйсерсийг дахин буулгаж авсан. Муу нь гэвэл Коби эхний үед шагайгаа булгалж, дараагийн тоглолтыг ч бас өнжих юм шиг харагдаж байлаа. Индиана эргэн ирэлт хийн Индианаполист болсон 3 дахь тоглолтонд хожлоо. Гэхдээ үүнээс илүү аминд тулсан санаа зовоохоор нэг асуудал байсан нь Кобигийн шагайны гэмтэл. 3 дахь тоглолт эхлэхийн өмнө тэр надаас хэдийгээр шагай нь маш их өвдөж байгаа ч өөрийг нь тоглуулахыг гуйсаар байсан. Гэсэн ч түүнийг хувцас солих өрөөний хонгилд өлмий дээрээ зовиуртай зогсож байхыг нь хараад түүнд тоглох боломж олгох нь хэтэрхий эрсдэлтэй гэж бодсон учраас дахин нэг тоглолт өнжүүлэхээр шийдсэн.
3 өдрийн дараа 4 дэх тоглолт эхлэх гэж байхад Коби тун их зовиуртай хэвээр байсан боловч би чадна гэж зүтгэсээр тоглосон бөгөөд тэр үдэш бүхэлдээ түүнийх болж таарсан юм. Нэлээд хүнд хэцүү тоглолт өрнөсөөр ялагч нэмэлт цагт шийдэгдэхээр боллоо. Гэсэн ч Шак нэмэлт цагийн эхний минутанд алдааны асуудлын улмаас талбайг чөлөөлчих нь тэр. Харин Индиана багаараа 14 оноо авсан бол Коби 8 довтолгоогоо амжилттай болгож, багийнхаа бүх 16 оноог авснаар бид 120-118 харьцаатайгаар хожсон юм. Шак талбай руу гүйн гарч ирээд "Том дүү минь" гэж дууддаг болсон залуугаа тэврэн авч билээ.
Коби намайг гайхшруулсан. Би түүнийг тэсэхүйеэ бэрх өвдөлтийг ч үл хайхрагч нэгэн болохыг анх удаа анзаарсан юм. Түүнийг юу ч хорьж дийлэхгүй. Тэр орой Коби надад Майкл Жорданыг санагдуулж билээ"
http://www.youtube.com/watch?v=C7Lp5aQq4zI