http://www.mongolnews.mn
Өгөө аваатай явсан үе тэнгийн арслангууд
Н.САРАНГЭРЭЛ, Ц.ЭНХМАА (2007.02.14)
“Алтан үеийнхэн”-ий энэ удаагийн зочноор “Бөмбөгөр ногоон”-ыхон биш бөхийн зүлэг ногоон дэвжээнд аваа өгөөтэй явсан үеийн хоёр арсланг урилаа.
Монгол Улсын соёлын гавьяат зүтгэлтэн, хурц арслан Хөвсгөлийн Цагаан-Үүрийн харьяат Цэрэннадмидын Бадамсэрээжид гуайнх руу утас цохилоо. Хамтдаа Өвөрхангай аймгийн Гучин-Ус сумын харьяат Гялдангийн Цоодол арслангийнд очиж хууч хөөрье гэсэн саналыг дуртай нь аргагүй зөвшөөрөв. Бадамсэрээжид арслангийнх Сансарт, Цоодол гуайнх аравдугаар хороололд. Өвгөн арслангуудын уулзалтад хөг нэмэх үүргийг бид соёлын гавьяат зүтгэлтэн, сэтгүүлч Р.Чулуун ахдаа үүрүүллээ.
Р.Ч: Улсын цолтой бөхчүүдээс хамгийн ахмад нь та хоёр болж байна уу. Цоодол арслан та хоёрт насаар хамгийн ойрхон нь хэн байна, одоо?
Ц.Б:Насаар ойрхон хүн байхгүй ээ. Авхиа бид хоёр л ганц хоёр насны зөрүүтэй байсан юм.
Р.Ч: Прага явдаг чинь Авхиа гуай та хоёр уу?
Ц.Б:Тийм. Тэр чинь 1955 он.
Р.Ч:Тэр жилийн наадамд та хоёр барилдаагүй байх нь ээ?
Ц.Б:Барилдаагүй. Оргодол хөтөлгөө морьтой давхиж ирж түрүүлээд начин, зааныг алгасаж арслан болсон жил шүү дээ.
Р.Ч:Та Оргодол гуайтай барилдаж байв уу?
-Оргодолын түрүүлдэг наадамд 256 бөх зодоглосон юм. Анх удаа сугалаагаар барилдсан жил л дээ. Бид Прагаас наашаа хоёр сар шахуу явж наймдугаар сар дөхүүлж ирээд наадмын сонин дуулж, Оргодол гэж нөхөртэй барилдаж үзэх юмсан гэж бодсон. Төв аймгийн Өнжүүлд байдаг гэнэ. Удалгүй улсын цолтой 32 бөх тойргийн барилдаан хийх зар тарлаа.
Тэгэхэд л Оргодолыг анх харсан. Дагжганасан айхавтар догшин нөхөр байна. Сугалаагаар надтай гуравдугаар тойрогт таарлаа. Би амархан хаячихсан. Тэгэхэд Дамдин түрүүлээд би үзүүрлэсэн. Дараа нь наадмаар нэг таарсан.
Р.Ч:1956 оны наадам уу?
Ц.Б: 1957 оных. Зургаа давчихаад хэнийг авахаа мэддэггүй ээ. Хууччуулаа аваад барилдчихсан байдаг.
Р.Ч:Оргодол гуайгаас жаахан бэргээ юү?
Ц.Б:Жаахан бэргэсэн. Тэгээд яахав, Оргодолыг дуудаад “Чамтай барилдана аа” л гэлээ. Манай засуул “Авах хүн олон байхад. Цаадах чинь хэцүү, дайраад ороод ирнэ шүү. Цээжээ дор байлгаарай” гэж байна. Барилдаан эхэллээ. Тэр намайг өргөөд индрийн зүг явж өглөө. Би ч түүний хүзүүн дээр хөндлөн л юм байв. Хөл дээрээ л буугаадахвал болох байгаа гэж бодож явлаа. Тэгээд буулгахад нь би ганцхан зайлаад тавьчихсан. Тэгсэн Оргодол “Яачихав аа” гээд их гайхаж байна. Би ч чулуу таарсан байх аа л гэлээ. Хожим нь түүнээс намайг шууд хаячихгүй индэр рүү яах гэж өргөж явсныг асуухад “Индрийн өмнө, дарга нарын урд аваачиж хаямаар санагдаад. Заавал намайг авч байхдаа яадаг юм гэж шаралхаж дургүй хүрээд” гэсэн шүү.
Р.Ч:Цоодол арслан та хоёр улсын наадмын дэвжээнд олон таарсан уу?
Ц.Б:Бид хоёр ч таарсан. Цоодол намайг нэг, би түүнийг нэг хаясан юм. Бид хоёрын амжилт яг ижилхэн. Улсын наадамд нэг нэг үзүүрлэсэн. Шөвгийн дөрөвт долоон удаа үлдсэн. 11-хэн жил барилдсан юм.
Р.Ч:Цөөхөн жил юм?
Ц.Б:11 жил барилдахдаа нэг нэг үзүүрлээд, бусдад нь шөвгөрсөн.
-Та хотын хүн болоод удаж байна уу?
Ц.Б:62 жил болж байна даа.
-Тэр үед Улаанбаатарын хамгийн өндөр барилга хаана байв?
-Хамгийн өндөр нь нэгдүгээр арван жил, Улаанхуаранд Ерөнхий сургуулийн байр байж. Хотын төвд. Өндөр хоршоо гэж хоёр давхар байшин. Тэр том байшинд орж үзэх гэж ангиасаа оргоод.
-Тэгээд орсон уу?
-Орсон орсон. Харин гарахдаа төөрөөд хаалгыг нь олохгүй жаал будилсан.
-Та цэргийн албанд татагдаад хотод иржээ дээ?
-Хязгаарын цэргийн ангид ирээд тэр чигээрээ Хязгаарын газарт байж байгаад Нийгмийг аюулаас хамгаалахад нэг ширээндээ 40 жил суугаад тэтгэвэрт гарч байлаа. Дараа нь Төлөвлөгөөний комисс энэ тэрд алба хаасан.
Цоодол арслангийнд ирлээ. Тэд ингэж нэг нэгнийдээ зочлоогүй арваад жил өнгөрсөн гэнэ. Наадмын талбай, Бөхийн өргөөнд л хааяа таардаг байснаа сүүлийн хэдэн жил Цоодол гуайн хөл муудаад гэрээс гарахаа больсноос хойш сургаас цаашгүй болсон аж. Найзыгаа ирнэ гэсэн сургаар арслан ч хөөрчихөж. Охиноо шавдуулж бууз хүртэл хийлгээд амжсан байлаа.
Г.Ц: Хурц арслан минь хүрээд ирдэг овоо доо. Би ч мартах нь санахаасаа илүү болсон өвгөн. Ерэн нас амаргүй юм байна.
Ц.Б: Та надаас хэд ах юм бэ. Луутай гэдэг бил үү?
Г.Ц: Би могой жилтэй. 1916 оных. Цагаан сарын өмнө төрсөн байх.
Ц.Б: Цагаан сар болох нь. Батлан хамгаалах яамныхан урив уу?
Г.Ц: Чимээгүй л байна шүү дээ. Намайг байгаа байхгүйг мэддэггүй юм болов уу?
Ц.Б: Юу гэсэн хэл вэ. Тэр байгууллагад 50 шахам жил ажилласан хүнийг дуудаад ганц аяга сүүтэй цай өгчихөж болдоггүй юм уу, тэд. Тэр Сономпил сайдад хэлэх юмсан.
Г.Ц: Уг нь би насаараа Ардын цэрэгт данстай явсан хүн шүү дээ. Одоо ч Бөхийн холбооныхон л мэдэхээс бусад нь ч… Өвөрхангайнхан цугладаг л бололтой. Би ч гэрээс гарахгүй болохоор хүн хартай уулзахгүй юм даа.
Ц.Б: Танай аймгийнхан залуу бөхчүүддээ унаа тэрэг гээд сүйд болдог юм байх нь билээ. Ганц үлдсэн өвгөн арсланг тоохгүй л байна даа. Би харин оны өмнөхөн нутаг яваад ирсэн.
Г.Ц: Өө тэгээ юү. Хүйтэн байна уу?
Ц.Б: Цаг агаар сайхан байна аа. Бөхийн чуулга уулзалт гэж хийгээд, намайг урьсан. 500-гаад төлөөлөгч цуглаад бөхийн залгамж халаа тасарлаа гэж ярилцаад их зүйл хийхээр төлөвлөж байна.
Г.Ц: Аргагүй ээ, нэг үе Чимэд-Очир, Бээжин, Дамдин гээд мундаг бөхчүүд байлаа.
Ц.Б: Одоо надаас дээш харах хүн алга. Нутгийнхан сайхан угтсан. Урин дулаан болохоор намайг хөл дүүжлэх унаатай болгоно гэсэн. Бас хөдөлмөрийн баатарт тодорхойлсон гэнэ.
Г.Ц: Тэгвэл чи баатар болох нь ээ.
Ц.Б: Тэр баатар ч яах вэ. Төрийн хишиг хангалттай хүртсэн. Соёлын гавьяат гэдэг том цол шүү.
-Цоодол арслан та хоёр хэдийд танилцсан юм бэ?
Ц.Б: 1947 оны наадмаар.
Г.Ц: Би чинь 1944 оны улсын заан байх аа, Сэрээжид ээ?
Ц.Б: Тэгэлгүй яах вэ. Та улсын заан болсоор бүтэн жаран өнгөрөөд явж байна.
Г.Ц: Тэр жил Түвдэндорж түрүүлж, Чимэд-Очир үзүүрлэж Чүлтэмсүрэн бид хоёр дөрөвт хоцорч байлуу. Хойтон нь дахиад бид дөрөв үлдсэн санагдана.
Ц.Б: Чүлтэмсүрэн арслангийн оронд Хөвсгөлийн Цэвээнравдан үлдсэн шүү дээ.
Г.Ц: Нээрэн тийм.
Ц.Б: 1947 оны наадам Батсуурийн цоордог жил. Түвдэндорж, Чимэд-Очир хоёр Прага явчихсан хойгуур Шаравын Батсуурь гэнэт тодорч, үзүүр түрүүд таныг хаяад түрүүлсэн шүү дээ.
Г.Ц:Чи гол дээр унтаад Батсуурийг хийлүүлчихээ биз дээ?
Ц.Б: Тавын даваанд хийлж байсан түүх аль ч засгийн наадамд байхгүй юм билээ. Бид хоёр дөрөв давчихаад, амлаж авдаг хүн байхгүй. Хооронд нь тунаагаад хаячихгүй юу. Тэгсэн нутгаас ирсэн хүмүүс дуудаад Туулын зах дээр аваачиж айраг цагаа, хоол ундаар дайлсан юм. Тэгсэн машины сүүдэрт хэвтэж байгаад унтчихаж. Батсуурь 11 цагт гарч зодоглоод хүлээсэн байгаа юм. Би дөрвөн цагт сэрсэн.
Бушуухан босоод зодог шуудгаа бариад гүйгээд очтол Батсуурь хий мөргөөд боорцгоо аваад явж байна аа. Дамба даргатай таарлаа, Намын Төв хорооны нарийн бичгийн дарга. “Хэн бэ чи, хаачаад ирэв” гэж байна. “Голын зах дээр унтчихжээ” л гэлээ. Тэгсэн тавын даваанд хийлүүлж болохгүй гээд бүтэн салаа цэрэг гаргаж Яармагийг самнуулсан байгаа юм. Голын захад унтаж байгаа хүнийг яаж олох вэ. Дамба гуай манай даргыг дуудаад “Би чамд арга хэмжээ авна, чи цэрэгтээ арга хэмжээ аваарай. Ганц цэрэг дэргэдээ аваад барилдуулж чаддаггүй яачихсан дэд хурандаа вэ” гэж Гүрбазар даргыг хангинаж гарсан.
Г.Ц:Тэр жил чи уг нь түрүүлэх байсан юм. Батсуурь сайн байгаагүй шүү дээ.
Ц.Б:Түрүүлэх боломжоо яах аргагүй алдсан л даа. Тэгээд намайг сахилгад гурав хоног хорилоо. Гүрбазар дэд хурандаагийн цолыг хурааж хошууч болгосон. Уг нь Дорж генерал намайг фестивальд явуулна гээд нэрийг минь өгчихсөн байж. Тэр ч байхгүй. Ийм л хатуу үе байсан юм. Гэхдээ дараа жил нь дахиад Батсуурь түрүүлж, та үзүүрлээ биз дээ.
Г.Ц:За би ч хольж хутгаж мэднэ шүү. Түвдэндорж, Чимэд-Очир хоёр чинь Батсуурь бид хоёрыг эзгүйчилж дээр гартлаа барилдсан гэж ил цагаан хэлж байгаад долоогийн даваанд амлаж авцгаасан. Бид ч хичээгээ биз. Нөгөө хоёрыгоо дарж унацгаалаа. Наймын даваанд би Хужааг /Чүлтэмсүрэн арсланг хэлж байна/, Батсуурь Цэвээнравданг залж дахин үзүүр түрүү булаалдсан. Би Батсуурийг бараагүй ээ. Одоо бодоход их сайхан наадам болсон юм. Харин бид хоёрын тунадаг чинь хэдэн он билээ?
Ц.Б: 1950 оны наадам. Долоогийн даваанд тунаад. Наймын даваанд би Чүлтэмсүрэн арсланд унаагүй юу.
Г.Ц: Чи 1952 оны наадмаар хурц арслан бол луу?
Ц.Б: Биш ээ. 1952 онд та долоогийн даваанд Батсуурийг хаяад, наймд Түвдэндоржид өвдөг шороодоогүй юу.
Г.Ц: Тийм тийм, би нээрэн түүний дараа нэг жил өнжөөд Түвдэнтэй дахиад наймд таарсан юм байна. Түвдэн ер нь хэцүү. Тэр жил та хоёр үзүүр түрүүнд үлдсэн. Тэгэхээр чиний хурц арслан болдог чинь тэр жил гэсэн үг.
Ц.Б: Хамгийн сонин нь бид хоёр адилхан арслан цолтой, бас адилхан 11 жил зүлэг ногоон дэвжээнд зодоглосон байдаг юм. Хоёулаа улсад хоёр хоёр үзүүрлэсэн. Таваас доош даваанд унаж байсан түүх байхгүй. Зүгээр ч нэг бөхчүүдтэй биш дөрвөн аварга, найман арслан, тоймгүй олон заан цолтонтой хүч үзэж байж энэ цолонд хүрцгээсэн хүмүүс. Одоо ч гэсэн хамгийн ахмад настай том цолтой нь бид хоёр л үлдэж. Одоогийн томчуудаас дархан аварга Баянмөнхийг та начин болгоо биз дээ?
Г.Ц: За үгүй дээ. Сүхбат нь харин нэг үе ирдэг байсан.
Ц.Б: Аваргад золгох хадаг олдохгүй байна гэж баймааргүй л юм даа. Таныг мартах учиргүй л хүн дээ.
Г.Ц: Зав нь болдоггүй биз дээ.
Ц.Б: Улсын цол авна гэдэг тэр үед ямар хэцүү даваа байлаа даа. Би анх барилдахдаа начин л болчихвол гэж боддог байсан.
Г.Ц: Чи начин аваагүй биз дээ?
Ц.Б: Шууд долоо даваад заан болчихсон юм. Нөгөө “сраз майор” гэдэг шиг. Би 23 насандаа Монгол Улсын арслан болсон.
-Цоодол гуай та олон жил жолооч хийсэн. Тэр дундаа дандаа сайдын тэрэг барьж байсан гэдэг байх аа?
-Өө тэгсэн тэгсэн. Цэрэгт ирж жолооч болоод. Залуу жанжин Ж.Лхагвасүрэн, Санжийн Батаа, Батын Дорж гээд дандаа сайхан хүмүүсийн тэргийг барьж байлаа. Маршалын тэрэгний дараа орох хамгийн сүүлийн үеийн гоё машины жолоог мушгисан даа.
-Анх танилцахад Бадамсэрээжид гуай ямаршуу залуу байв?
-Сайхан залуу байсаан.
-Хүчтэй, мэхтэй сайн бөх үү?
-Хүчтэй гэхгүй ээ. Харин мэх сайтай. Хурдан сурамгай барилдана. Биеэр нэг их өндөрт орохгүй ч бие хаа сайхантай. Энэ чинь Хязгаарын, би Ардын цэргийнх. Манайхан хоорондоо бөхөөрөө өрсөлдөнө.
Ц.Б: Лхагвасүрэн жанжны бөх Цоодолыг долоо давуулалгүй авч хая гээд Чимэд-Очирт үүрэг өгнө. Хязгаарын цэргийн Бадамсэрээжидийг цааш нь ахиулалгүй авч хая гэнэ. Тийм л байсан. Гэхдээ их шударга тэмцэлдэнэ.
Г.Ц: Наадмын бэлтгэл хийхэд хүртэл хэн хаана яаж байна гэж асуулгаад л…
Ц.Б: Цоодол Лхагвасүрэн жанжны тэргийг барьж байсан. Жанжин Батлан хамгаалахын сайд. Дорж гуай манай Хязгаарын газрын дарга. “Хязгаарын газрын бөх юу идэж байна, үзээд ир” гээд Лхагвасүрэн жанжин тагнуул тавина. “Лхагвасүрэн бөхөө ямар бэлтгэлтэй гаргаж вэ” гэж Дорж генерал асуулгана. Өдөрт хоёр хонь идэж байна гэвэл бидэнд гурвыг өгнө. Дандаа жороо морь унуулж, том гэрт суулгана.
Бид арван хэдүүлээ ч гурван хонь яаж барах вэ, чанаад түмпэн дүүрэн мах гэрийн хоймроо тавьчихна. Нутгийн залуус, охид хүүхнүүд олон ирнэ. Тэд идэж уугаад таардаг байсан даа. Баахан дэмий ярьж инээж хөхөрсөн л улс байж. Нэг удаа яг тэгж олуул байхад Дорж генерал ирж таарлаа. “Хаанахын юун улс вэ. Бөхчүүдийн гэрт шаваад. Эднийг бүгдийг нь барьж шоронд хий” гэснээс хойш харин ирэхээ больсон.
-Та хоёр анх таарч барилдсан тухайгаа хуучлаач?
Г.Ц: Чи ярь.
Ц.Б: Анх би энийгээ зовоосоон. Манайхан Ардын цэргийн Цоодол чамайг амлана гэж байна гээд. Хоёулаа цэрэг, зургаа давчихсан. Долоогийн даваанд ам авахад нь дагаад л цохичихлоо. Мань эр ч намайг авч байна. Тэгээд Чимэд-Очиртоо “Намайг Цоодол арслан авчихлаа. Яаж барилдах вэ. Би ч өнгөрлөө” л гэлээ. Тэгсэн “Юу өнгөрлөө гэж. Чи чавганц, хүүхнүүдтэй ноцолдож цол авах гээгүй юм байгаа биз дээ. Арслан, аваргыг хаяж байж цолонд хүрнэ” гэсэн. Би ч дотроо бантаад л байлаа.
Тэгтэл наадам түр завсарлана гэж зарлаад Цэдэнбал дарга, Самбуу гуай хоёр гараад явчихлаа. Тэр хойгуур нь би циркийнхний байранд очлоо. Наадам тэгэхэд Яармагт болдог байсан юм. Циркийн буурал Төгс гэж бүсгүйтэй танилцаад байсан үе. Монголд агаарын гимнастик тоглодог ганц жүжигчин нь байсан юм. Тэднийхэн намайг манай хүргэн гээд сүйд. Хар шөл хийлгэж уугаад орон дээр нь хэвтчихнэ. Амарч байгаа нь тэр. Нэг сэрсэн гурван цаг болчихож. Яараад наадмын талбай руу гүйхээрээ очлоо. Бусад нь даваад явчихаж. Энэ ганцаараа намайг хүлээгээд, ууртай ч гэж жигтэйхэн байна. Гүрбазар дэд хурандаа чи дандаа ингэж байдаг гээд том ташуураар гүвдрүү гартал ороолгож өгөөд гаргасан.
-Та тэгээд даваа юу?
-Миний сээрэн дунгуй ид байсан үе. Барилцаад авсан ч давсан унаснаа мэдэхгүй байтал үзэгчид талбай руу түрээд ороод ирчихсэн “Наад цэрэг чинь давсан” гээд хашгиралдаж байсан. Цоодолыг харлаа. Нөгөө сайхан ухаа торгон зодогны ар нь нуль шороо, өөрийгөө хартал гайгүй ээ. Тэгээд л давж гэж бодсон. Энэ маань ч “За миний дүү сайн барилдаарай” гээд тахимаа өгсөн.
Бидний үед бууж өгөх найраа энэ тэрээ байгаагүй. Хэрэв хэн нэг нь намайг аваач гэвэл хөлийн цэц дээр дагуулаад очдог юм. “Наадах чинь цол гуйж явна, надтай тавьчих, намайг хаяад цолоо аваг” гэдэг үе байсан. “Цолыг гуйж авахгүй, гуядаж авдаг юм шүү дээ” гэж хэлээд хаячихдаг байж.
Г.Ц: Манай энэ мундаг мундаг. Бөх сайхан тайлбарлана.
Ц.Б: Тасралтгүй 35 жил тайлбарласан шүү. Тэгэхдээ хоёр удаа намаасаа шийтгүүлж, эрхээ хасуулсан.
-Ямар хэрэг тариа вэ?
-Үндэсний үзэл гаргадаг, нутгархдаг гэж. Нэг удаа бүр миний намын батлахыг хураана гээд. Би өгөөгүй. Түүнийхээ оронд бөх тайлбарлах эрхийг минь хас гээд гэдийчихсэн.
Өвгөд ийн хуучлав. Нар гудайж бүрэнхий болсон тул Бадамсэрээжид арслан гэртээ харихаар яарав. “Ханийн минь бие тааруу байгаа. Эртхэн очих минь” гэх түүнийг хориглож түвдсэнгүй.