2011-12 оны “аваргуудын лиг”-ийн 15 сонирхолтой баримт** "Челси" Аваргуудын лигийн 57 дахь жилийн түүхнээ аваргын цомыг нь хүртсэн Лондон хотын анхны, харин зургаа дахь нийслэл хотын баг болжээ. Европын нийслэл хотуудын багаас хамгийн олон (9) цомтой нь мэдээж Испанийн Мадрид бол тэдний ард Амстердам (4), Лиссабон (2), Бухарест, Белград (тус бүр нэг) ордог билээ.
**Аваргуудын лигийн тэмцээн одоогийн форматаар (1992-2012) явагдах болсноос хойш финалд гурав дахь удаагаа ялагдсанаар "Бавари" нь "Милан", "Ювентус"-тай эн зэрэгцэв.
**Тус тэмцээний түүхэнд 10 дахь удаагаа аваргын хувь заяа торгуулийн цохилтоор шийдэгдлээ.
**Төрөлх хот нь зуны олимпийн наадмыг зохион байгуулах жилд энэхүү цомыг өөрийн болгосон хоёр дахь баг нь "Челси" юм. Ийм амжилтыг 1992 онд "Барселона" үзүүлсэн.
**Европын хамгийн том клубүүдийн тэмцээнд талбай дээрээ түрүүлсэн цорын ганц баг нь "Интер" хэвээр үлдэв. Миланчууд 1965 онд аваргын цомыг өргөж байсан. Харин 1984 оны финалыг "Рома" талбай дээрээ хүлээж авсан ч пенальтиар "Ливерпуль"-д дийлдсэн.
**Аваргуудын лигийн цомыг 10 дахь удаагаа итали дасгалжуулагчийн удирдсан баг хүртлээ. Роберто Ди Маттео гэхдээ гадаадын багийг удирдаж түрүүлснээрээ анхдагч. Нийт 9 удаа испани дасгалжуулагчийн удирдсан баг энэ тэмцээнд аваргалж байжээ.
**"Бавари" анх удаагаа Евроцомын тэмцээнд торгуулийн цохилтоор дийлдлээ. Үүнээс өмнө мюнхенчүүд 11 метрийн торгуулийн цохилтоор 4 удаад нь өрсөлдөгчөө хожиж байсан.
**2001 оноос хойш Аваргуудын лигийн финалд анх удаагаа герман хөлбөмбөгч гоол орууллаа. Штефан Эффенбергийн 11 жилийн өмнөх амжилтыг энэ удаад Томас Мюллер давтсан юм. Харин Дидье Дрогба нь энэхүү тэмцээний түүхнээ финалд гоол оруулсан гурав дахь африк тоглогч болов. Түүнээс өмнө Рабах Мажер (1987), Самуэль Это'О (2006, 2009) гоолдсон юм.
**2003 онд Роман Абрамовичийн эзэмшилд очсоноос хойш “Челси” баг Аваргуудын лигийн хэсгийн тоглолтод тогтмол оролцож ирлээ. Хэрэв тэд энэ удаад финалд ялагдсан бол энэхүү урт цуврал тасалдах байсан билээ.
**Абрамович ирснээс хойш “Челси” Аваргуудын лигт 100 дахь тоглолтоо хийсэн нь энэ байжээ. 2003 оноос хойш нэг ч баг 91-ээс дээш тоглолт хийгээгүй бөгөөд энэ хугацаанд авсан оноогоороо лондонгийн багаас илүү гарсан ганц баг бол (цэнхэрүүд 180 оноо) Испанийн "Барселона" (91 тоглолтод 190 оноо) юм.
**"Бавари"-гийн хагас хамгаалагч Арьен Роббен нэмэлт цагт торгуулийн цохилт алдаж багаа хөөдсөн билээ. Гэхдээ тэрбээр Евроцомд анх удаагаа ингэж алдаа гаргаагүй гэнэ. Голланд хагас 2007 онд “Челси”-д байхдаа Аваргуудын лигийн хагас шигшээд “Ливерпуль”-ийн эсрэг тоглолтод торгуулийн цохилтоо мөн алдаж байсан.
**"Челси"-гийн хамгаалагч Эшли Коул нь тус тэмцээний түүхэнд түрүүлэх хүртлээ финалын тоглолтод хоёр удаа ялагдахын гашуун зовлонг үзсэн гурав дахь тоглогч боллоо. Түүнээс өмнө Велибор Васович, Зинедин Зидан ордог. "Челси" багийн довтлогч Фернандо Торрес клубүүдийн түвшинд анхны томхон цомоо хүртлээ. Тэрбээр энэ улиралд Английн цомын аварга болсон ч шийдвэрлэх тулаанд талбайд гараагүй билээ.
**"Бавари"-гийн хагас хамгаалагч Бастиан Швайнштайгер тоглолтын хоёр дахь минутанд шар хуудас хүртсэн нь Аваргуудын лигийн финалын тоглолтын хамгийн хурдан торгууль болон түүхэнд үлдлээ.
**"Челси"-гийн хамгаалагч Райан Бертранд Аваргуудын лигийн анхны тоглолтоо шууд финалд хийж чадсан анхны тоглогч болов. Түүн шиг ийм амжилтыг Найжел Спинк, Тревор Фрэнсис үзүүлж байсан, гэхдээ тухайн үед тэмцээн Аваргуудын цом нэртэй байсан юм.
Н.Энхбаяр Zaluu.com