Түрүү жил улирлын өмнө ингэж бичиж байжээ.
Яахуу, НБА дээр гарсан preview харьцуулаад, өөрийн саналаа нэмээд...
Уншсан чинь сонирхолтой л байна.
Майами Хит – Улирлын өмнөӨнгөрсөн улиралд Майами Хит 15-67 гэсэн итгэмээргүй муу амжилт үзүүлсэн. Уэйдтэй 10-41. Тэд энэ амжилтаа ахиулах, плей-оффт орох, цаашлаад финалд үлдэх боломж байгаа юу?
Мэдээж ахиулах нь бол тодорхой. Өнгөрсөн улирлынх шиг тийм хар энерги, том ангал энэ удаа байхгүй болсон биз. Харин плей-оффт үлдэх болов уу? Дорнод конференц одоо тийм ч муу биш болсон, жигдхэн багуудтай болсон.
Дуэйн Уэйд хэдийгээр өнгөрсөн улирлыг тэр чигээр нь өнжөөгүй, талаас их буюу 51 тоглолтонд оролцсон ч гэсэн энэ улиралд түүнийг шинээр эргэн ирж байгаа гэж ойлгож болно. Өнгөрсөн улиралд нэгэнт амжилт гаргахгүй нь тодорхой байсан тул Уэйд элдэв нервгүй, биеэ зовоохгүй тоглож байсан, угаасаа ч цөөхөн тоглолтонд оролцсон, плей-оффт шалгараагүй тул сайн амарч, бэртлээ бүрэн эдгээхэд илүү их цаг зарцуулж чадсан нь одоо эерэг нөлөөгөө үзүүлэх байх. Олимпоор Уэйд хэрхэн мундаг тоглосныг бид сайн санаж байна. Тэр Кобигоос ч, ЛеБроноос ч сайн тоглосон. Бээжинд хамгийн шилдэг нь байсан. Тэр формоороо энэ улиралд тоглох болно. Ер нь энэ улиралд Уэйд болоод түүний баг сайн тоглохгүй бол Уэйд хэмээх брэнд моодноос гарч эхэлж болзошгүй. Уэйд сайн тоглоход гэмтэл л саад болж чадна. Хэдий тэр одоо гэмтэл бэртлээсээ ангижирсан гэж байгаа ч нэлээн гэмтэмтгий тоглогчдын нэг. Өнгөрсөн 2 улиралд тус бүр 31 тоглолт өнжсөн. Эдгээр улирлуудын өмнө Уэйдээс бүгд л ихийг хүлээж байсан, яг л өнөөдрийнх шиг. Өнөөдрийн хүлээлтийн ялгаа нь миний хувьд “Тэр арай ч дахиад гэмтчихгүй байлгүй дээ, өмнөх 2 улирал шиг тийм азгүй зүйл дахин тохиолдохгүй байх” гэсэн бодол байна. Гэхдээ аль азгүй явдлыг хэлж барахав, болгоомжтой хандах хэрэгтэй.
Майами сайн амжилт үзүүлэхэд Уэйдээс гадна бусад тоглогчдын нөлөө ч их бий. Юун түрүүнд Шон Мэрион хэр тоглох бол? Ерөөсөө Мэрион энд байхдаа сэтгэл хангалуун байна уу, түүнд Майамид үргэлжлүүлэн тоглох хүсэл эрмэлзлэл хэр их байгаа бол? Мөн Мэрионы Финикст үзүүлдэг байсан шилдэг тоглолт Майамид өнгөрсөн улиралд тэр бүр харагдаагүй. Майамид Стив Нэш шиг сайн холбогч байхгүй, Мэрионд шууд оноо авах бөмбөг дамжуулахгүй байсан нь ч нөлөөлсөн биз. Өнгөрсөн улиралд Мэрион Финикст хийсэн 47 тоглолтондоо 52.6 хувийн довтолгооны амжилттай байсан бол Майамид ирээд 45.9 болтлоо буурсан.
Ирэх зун Мэрион чөлөөт агент болно. Чөлөөт агент болох дөхсөн тоглогчид хичээж сайн тоглож, сайн гэрээ хийх нөхцөлөө бүрдүүлэхийг хүсдэг. Мэрионд ч тийм бодол байгаа байх.
Майамигийн аварга болж байсан бүрэлдхүүнээс одоо Уэйд, Удонис Хаслем нар л үлдэж.(Доррель Райтийн нэр байгаа ч тэр тоглохгүй байгаа) Пэт Райли ч дасгалжуулахаа больж, удирдах албаны хүн болсон. Тиймээс бид энэ улиралд шинэ Майами, дээр хэлсэнчлэн шинэ Уэйдийг л харах болно. Энэ баг дахин цогцлон босож байгаа.
Шинэ Майамигийн нэгэн чухал хэсэг нь энэ зуны драфтын номер 2 Майкл Бисли байх боломжтой. Магадгүй Уэйд – Бисли гэсэн хослол удахгүй лигийн шилдэг хослолуудын тоонд орж болох юм. Коллежед байхдаа Бисли 26.2 оноо, 12.4 оноо авч байсан. Тэр Майамид хүчний довтлогчоор тоглох болох нь. Тэрээр хангалттай авьяастай, потенциалтай ч NBA гэдэг тийм амархан ертөнц бас биш. Шинэ тоглогчоос хэт ихийг хүлээх бас л дэмий. Мөн зарим нэгнээс түүний зан характераас болгоомжилсон үгс унаж байгаа явдал ч бий. Дунд сургуульд байхаасаа эхлээд л сургуулиасаа хөөгдөж туугдаж ирсэн, драфтын дараа хар тамхи хэрэглэж байгаад баригдсан гээд таагүй намтар түүнд нэлээд байна.
Бисли уг нь хөнгөн довтлогчоор тоглох чадвартай, Мэрион хүчний довтлогчоор тоглож чаддаг ч Бислиг хурдтай SF-үүдийг хамгаалж чадахгүй байх гэж үзсэнээс хүчний довтлогч болгосон болов уу. Ер нь Майамигийн гарааны бүрэлдэхүүн нэлээн жижиг, намхан байх нь. Уэйд ч гэсэн шиддэг хамгаалагчдынхаа дунд намханд орно.
Юутай ч дасгалжуулагч Эрик Споелстра шилдэг гурвалаа хамтад нь түлхүү тоглуулна гэдгээ хэлсэн. Дасгалжуулагч гэснээс Хитийн дасгалжуулагч ямар байхыг ёстой тааж хэлж чадахгүй нь, ямар ч байсан туршлагаар хомс.
Майамид төвийн тоглогч болон холбон тоглогчийн байрлал асуудалтай байгаа. Хаслем, Жамал Маглойр, Марк Блоунт, Жеймс Жоунс, Жол Энтони, Дэвид Пажетт нар төвд тэр бүр гялалзтал тоглохгүй л байх. Эхний нөхөр бол Шакыг байхад хүчний довтлогчоор тоглодог байсан, үндсэн байрлал нь ч довтлогч. Бусдаас нь их юм хүлээлтгүй.
Холбон тоглогчоор Крис Куинн өнгөрсөн улиралд 25 тоглолтонд гараанд гарсан, магадгүй энэ улирлын гарааны холбогч байх. Мөн Марио Чалмерс, Шон Ливингстон нар гарааны эрхийн төлөө өрсөлдөнө. Харин Маркус Бэнкс Уэйдийн замен болж байгаа сурагтай.
Бүрэлдэхүүний хувьд ингээд аваад үзэхээр тааруухан л байна. Уэйд, Мэрион, Хаслем, хэрхэн тоглохыг нь одоогоор хэн ч мэдэхгүй шинэ тоглогч Бисли гээд л бараг зогсох нь дээ.
Ер нь Майамигийн итгэл найдвар нь Уэйд л байна. Ерөөсөө ч Майами бол Уэйдийн баг. Тэр гэмтэл бэртэлгүй байвал дэлхийн хамгийн шилдэг 5 сагсан бөмбөгчний нэг. Мөн Коби, ЛеБроны хамт хамгийн авьяаслаг тоглогч. Сайн тоглогч багаа чирдэг. Уэйд тэгж чадна. Майами өнгөрсөн улирлын амжилтаа ахиулах нь мэдээж, мөн плей-оффт ч хүрнэ. Хэдий Дорнод конференц одоогоор “нээлттэй” байгаа, аль нь ч шигшээ тоглолтонд хүрч магадгүй ч Хит харин арай л барахгүй болов уу
www.sportnews.mn